“Kanë paga që nuk krahasohen me pagat e askujt këtu”, Rama kritika ministrit të Drejtësisë: Ulsi si ka mundësi që SPAK nuk ka mjete për të regjistruar marrjen në pyetje?

Kryeministri Edi Rama ka kërkuar që seancat e marrjes në pyetje nga prokuroritë të regjistrohen, duke ngritur shqetësime mbi mënyrën se si zhvillohen hetimet. Gjatë mbledhjes së grupit parlamentar të Partisë Socialiste, Rama kritikoi faktin duke iu drejtuar ministrit Ulsi Manja, që pavarësisht fondeve të mëdha të alokuara për drejtësinë, hetuesit ende nuk përdorin mjete moderne për regjistrimin e intervistave me personat që merren në pyetje.

“Si ka mundësi, Ulsi dhe ju njerëzit e drejtësisë, që kjo shumicë qeverisëse ka miratuar fonde të jashtëzakonshme për mbrojtjen dhe drejtësinë, paga që nuk krahasohen me askënd tjetër, dhe këta nuk kanë ende mjetet për të regjistruar intervistat?” u shpreh Rama.

Ai denoncoi faktin se dëshmitarët apo të dyshuarit mbahen për orë të tëra dhe në fund u jepet vetëm një procesverbal me deklaratat e tyre. Rama përmendi edhe një episod personal, duke thënë se e kishte përjetuar vetë këtë situatë.

“Unë flisja dhe njëri shtypte tastierën. Ku jemi këtu ne? Në çdo film sa herë që dikush shkon te dhoma e hetuesve, i tregohen të drejtat dhe regjistrohet intervista. Këtu jo, vetëm një copë letër. Kur futesh atje, je në një republikë tjetër? Vetëm se është prokuror, është mbi ty? Je një mish që mund të shqyhesh sipas oreksit të njërit e tjetrit?” deklaroi ai.