Një grabitje me armë zjarri është shënuar orët e para të mëngjesit të sotëm në Fushë-Prezë, ku pre ka rënë një firmë private.
Grabitja mësohet të jetë kryer rreth orës 04:23 të mëngjesit, ku katër persona, dy ndër ta të armatosur kanë hyrë në rrethimin e firmës dhe kanë neutralizuar rojet e sigurisë së biznesit duke i kanosur.
Pasi kanë arritur të marrin 70 mijë lekë, janë larguar në drejtim të paditur. Burime të policisë bëjnë me dije se u njoftuan nga salla operative e një policie private.
Detaje të Policisë së Tiranës:
Më datë 06.04.2017, rreth orës 04:23, ka ardhur një telefonatë tek Nr. 112, nga salla operative e një firme Sh.P.S.F.-je (polici private), se në Fushë Prezë, tek një firmë kanë hyrë 4 persona.
Menjëherë janë nisur shërbimet e policisë ku kanë marrë kontakt me rojet e kësaj firme të cilët kanë deklaruar paraprakisht se:
Katër persona, ku dy prej tyre dyshohet të kenë qënë të armatosur kanë hyrë brenda rrethimit, ku personat e armatosur kanë arritur të neutralizojnë rojet, ndërkohë që dy personat e tjerë, kanë kontrolluar zyrat e kësaj firme. Këta shtetas kanë arritur të marrin një shumë monetare prej 70.000 lekësh.
Grupi hetimor po punon për identifikimin dhe kapjen e autorëve të kësaj ngjarje.
(XH.A/SHUPLAKA)
