Një 32-vjeçar ka rënë në prangat e policisë pasi në makinën e tij iu zbulua tritol. Ngjarja ka ndodhur sot në kryeqytet, ku Ardi Ahmetaj u ndalua në rrugën “Tre Dëshmorët” nga policia, e cila pas një kontrolli zbuloi dy kallëpe me tritol.
Ahmetaj ndodhet në qelinë e paraburgimit dhe pritet t’i nënshtrohet procedurave të mëtejshme të drejtësisë.
“Më datë 04.03.2017, Shërbimet e Komisariatit të Policisë Nr 6, kanë arrestuar në flagrancë shtetasin Ardi Ahmetaj, 32 vjeç, banues në Tiranë.
Ky shtetas është arrestuar, pasi në rrugën “Tre Dëshmorët”, në kryqëzim me rrugën “Konferenca e Pezës”, pas një kontrolli të ushtruar në automjetin e tij tip “Ford”, i’u gjetën dhe u sekuestruan në cilësinë e provës materiale: – Dy kallëpe të dyshuar lëndë eksplozive e llojit Tritol.
Po punohet për dokumentimin e kësaj ngjarje, për zbardhjen e qëllimit të mbajties së lëndës eksplozive si dhe të destinacionit final.
Materialet proceduriale do ti kalojnë Prokurorisë pranë Gjykatës së Shkallës së Parë Tiranë, për veprën penale “Prodhimi dhe mbajtja pa leje e armëve luftarake dhe e municionit”, parashikuar nga Neni 278 i Kodit Penal.”, thuhet në njoftimin e policisë.
