Shërbimet e Policisë Kufitare në Pikën e Kalimit Kufitar Qafë Thanë kanë arrestuar një shtetas të shpallur në kërkim ndërkombëtar, gjatë hyrjes në territorin shqiptar.
I arrestuari është Alija Arslan, 34 vjeç, banues në Kërçovë, Maqedonia e Veriut. Nga verifikimet e kryera në bashkëpunim me Interpol Tiranën, rezultoi se ai ishte shpallur në kërkim ndërkombëtar nga Interpol Bern/Zvicër, në zbatim të një urdhri arresti të lëshuar nga Zyra e Prokurorit Publik të Kantonit Argau.
Sipas autoriteteve zvicerane, Arslan është i dënuar me 20 vite burg për vepra penale të lidhura me trafikimin ndërkombëtar të narkotikëve, në bazë të nenit 19 të Aktit mbi Narkotikët dhe Substancat Psikotrope të Kodit Penal Zvicerian.
Policia shqiptare dhe Interpol Tirana po vijojnë bashkëpunimin me autoritetet zvicerane për përfundimin e procedurave të ekstradimit të tij drejt Zvicrës.
