Pas kapjes së 30 kilogramë heroinë në Portin e Durrësit, të fshehur në një kamion të ngarkuar me dru, ka reaguar Drejtori i Policisë së Shtetit, Haki Çako.
I shoqëruar nga zëvendësdrejtori i Policisë së Shtetit, Rebani Jaupi, dhe Drejtori i Përgjithshëm për Kufirin, Genc Merepeza, drejtori Haki Çako inspektoi mbrëmjen e sotme punën e Policisë në Portin e Durrësit.
Çako është pritur në Port nga Drejtori i Policisë Kufitare Durrës, Boke Bodini, dhe Drejtori i Drejtorisë Vendore të Policisë së Qarkut, Perlat Çullhaj.
“Çako ka falënderuar punonjësit e Policisë Kufitare dhe të Antidrogës, si dhe punonjësit e Kompanisë koncesionare amerikane S2 Albania të Skanimit për bashkëpunimin mjaft të mirë në drejtim të evidentimit dhe goditjes së trafikut të lëndëve narkotike. Çako inkurajoi punonjësit e Policisë duke u ofruar mbështetjen e tij dhe të Ministrit të Punëve të Brendshme për të luftuar pa kompromis trafiqet e paligjshme e në veçanti trafikun e lëndëve narkotike. Kapja e 30 kg Heroinë është një sukses i padiskutueshëm i Policisë së Shtetit, por dhe rezultatet e deritanishme në Port janë një tregues i qartë i vendosmërisë dhe seriozitetit të Policisë së Shtetit në këtë drejtim”, thuhet në njoftimin e Drejtorisë së Policisë.
Çako ka theksuar se po sot është finalizuar një tjetër operacion ndërkombëtar në bashkëpunim me Guardia Di Finanzan Italiane.
Siç raportoi “Shuplaka” mbrëmjen e djeshme, në trajlerin tip “Skania” me targa AA 618 JR dhe rimorkio ADR 186, të ngarkuar me dru në qytetin e Elbasanit dhe me destinacion Italinë, u gjet e fshehur heroina.
Policia arrestoi drejtuesin e kamionit Aurel Kryemadhi, si dhe u shoqëruan 4 persona.
Vlera e drogës së sekuestruar kap shifrën e milionë eurove.
http://faxnews.wpengine.com/kamioni-me-droge-ne-portin-e-durresit-zbulohet-sasia-e-heroines-qe-do-trafikohej/
