Katari ka dërguar një letër zyrtare Sekretarit të Përgjithshëm të Kombeve të Bashkuara, duke dënuar sulmin me raketa të Iranit ndaj bazës ushtarake Al-Udeid, e cila menaxhohet nga forcat amerikane dhe ndodhet në territorin e Katarit.
Në një deklaratë të Ministrisë së Punëve të Jashtme, thuhet se sulmi përbën një “përshkallëzim jashtëzakonisht të rrezikshëm dhe një shkelje flagrante të sovranitetit dhe integritetit territorial të Katarit”.
Më tej, në letër theksohet se sulmi i Gardës Revolucionare Islamike Iraniane përbën kërcënim të drejtpërdrejtë për paqen dhe sigurinë rajonale.
“Shteti i Katarit nënvizon se rezervon të drejtën për të reaguar drejtpërdrejt në një mënyrë të barasvlershme me natyrën dhe përmasat e këtij agresioni të hapur, në përputhje me Kartën e Kombeve të Bashkuara dhe të drejtën ndërkombëtare,” vijon deklarata.
Katai ka bërë të ditur gjithashtu se ka thirrur ambasadorin iranian për sqarime.
Ndërkohë, zëdhënësi i Ministrisë së Jashtme të Iranit, Esmail Baqai, ka reaguar duke thënë se sulmi i së hënës ndaj bazës ushtarake Al-Udeid “nuk kishte asnjë lidhje me shtetin e Katarit”.
“Veprimet e Iranit ishin akt vetëmbrojtjeje,” tha ai në një postim në rrjetin social X.
“Irani mbetet plotësisht i përkushtuar ndaj politikës së fqinjësisë së mirë me shtetin e Katarit dhe vendet e tjera fqinje,” shkruan Baqai.
Ai shtoi gjithashtu: “Ne jemi të vendosur të mos lejojmë që agresionet kriminale dhe politikat armiqësore të SHBA-së dhe Izraelit ndaj Iranit të krijojnë përçarje mes nesh dhe vendeve vëllazërore të rajonit.”
