Katër grupe kontrolli në zonat turistike, inspektorja e ISHTI-t: Kujdes me bombolat e gazit

Përdorimi i bombolave të gazit nga familjarët dhe bizneset është bërë më i rrezikshëm gjatë muajve të verës, për shkak të temperaturave të larta.

Kështu, Inspektorati Shtetëror Teknik ka përqendruar aksionin në zonat turistike duke ngritur 4 grupe kontrolli dhe në disa biznese ka gjetur shkelje, të cilat rrezikojnë jetën e pushuesve përreth.

Lajmin e ka bërë të ditur Nako Petro, e cila është inspektore në Drejtorinë e Naftës dhe të Gazit.

“Janë ngritur 4 grupe kontrolli një grup kontrolli ka përfunduar inspektimet në zonën e Velipojës dhe Shëngjinit një grup vazhdon në zonën e plazhit në Durrës deri në Divjakë një grup nga Vlora deri në Sarandë ndërsa një grup tjetër ka filluar të ushtrojë kontrolle në zonën e Pogradecit. Aktualisht janë kryer 64 kontrolle. Ka dhe subjekte që nuk i respektojnë normat dhe kushtet teknike janë vendosur 7 penalitete në 64 subjekte”, thotë Petro.

Sakaq, inspektorja këshillon qytetarët që të kenë kujdes në përdorimin e bombolave gjatë kësaj periudhe.

 “Eksperienca tregon që gjatë stinës së verës 70 % e zjarreve që ndodhin 50 % e rasteve vijnë nga ambientet e gatimit ndaj njerëzit duhet të jenë të kujdesshëm për përdorimin e tij në familje. ‘Barbeque’ duhet të përdoren në vende që janë të ajrosura mirë nuk lejohet që ato të përdoren kur shpejtësia e erës është më shumë se 10 kph”, u shpreh Petro. (D.D/Shuplaka)