2.6 % e Prodhimit të Brendshëm Bruto në Shqipëri janë të ardhura të përfituara nga tregtia e paligjshme e lëndëve narkotike. Ky përfudim është deklaruar në raportin e fundit vjetor të Komisionit Europian, ku përfshihet ecuria e vendit nga tetori i vitit 2015 deri në shtator 2016. Referuar raportit, hetimet financiare në lidhje me grupet e organizuara nuk janë zhvilluar në mënyrë sistematike dhe efektive dhe bashkëpunimi mes policisë dhe prokurorisë duhet të jetë më i ngushtë në mëyrë që shpërbërja e grupeve kriminale të jetë më efektive. Sakaq, sipas raportit numri i vendimeve të formës së prerë në rastet e grupeve të organizuara mbetet i kufizuar duke shënuar një rritje të lehtë vetëm vitet e fundit. Një tjetër përfundim në të cilin ka arritur KE në raport është se të dhënat për konfiskimin e pasurisë së paligjshme janë të ulëta.
KE thekson në raport se vitin e ardhshëm Shqipëria në veçanti duhet të dëshmojë progres në krijimin e një historiku të qëndrueshëm të hetimeve proaktive, ndjekjeve dhe hetimeve penale kundër grupeve kriminale, përfshirë konfiskimin e pasurisë së paligjshme, të përshtatsë legjislacionin përkatës me standardet evropiane dhe praktikat më të mira, të alokojë burimet njerëzore të mjaftueshme për të luftuar krimin e organizuar dhe në policinë e shtetit të aplikojë rekrutimin sipas meritës, ngritjen në detyrë dhe tranferimin ndërmjet zyrave të policisë dhe prokurorisë. Raporti i KE-së bazohet në disa burime si kontributet e Qeverisë Shqiptare, shtetet anëtare të Bashkimit Evropian, apo informacione nga organizata të ndryshme ndërkombëtare dhe joqeveritare.
