Sipas medias amerikane Bloomberg, negociatorët ukrainas dhe amerikanë po punojnë për të finalizuar një marrëveshje për mineralet e rralla. Vizita e të dërguarit të Donald Trump për luftën, Keith Kellog i përshpëjtoi bisedimet mes palëve.
Kellog në një postim në rrjetet sociale i quajti bisedimet me Volodymyr Zelensky mjaft positive dhe presidentin ukrainas një lider të guximshëm. Propozimi fillestar i SHBA, i cili përfshinte sigurimin e 50% të shitjeve të licencës dhe të ardhurave të tjera nga mineralet e Ukrainës, fillimisht u refuzua nga Kievi.
Zelenskyy i udhëzoi ministrat e tij që të mos nënshkruanin marrëveshjen, duke pretenduar se ajo favorizonte tepër interesat e SHBA-së dhe nuk kishte garanci specifike të sigurisë. Megjithatë, burimet per Bloomberg thonë se Ukraina tani po kërkon një marrëveshje që do të sjellë përfitime për të dyja vendet.
Këshilltari i Sigurisë Kombëtare i Shtëpisë së Bardhë Mike Waltz tha se Ukraina do ta nënshkruajë shumë shpejt marrëveshjen, për të paguar për investimet që SHBA ka bërë në luftë.
“Presidenti Zelensky do ta nënshkruajë atë marrëveshje. Do ta shihni që do të ndodhë shumë shpejt. Kjo do të rimbursonte qindra miliarda dollarët që janë investuar në këtë luftë nga taksapaguesit amerikanë.”
Waltz tha gjithashtu se Donald Trump ka biseduar me aleatët europianë dhe ai vetë ka pasur komunikime me sekretarin e përgjithshëm të NATO-s Mark Rutte.
Zyrtari amerikan përsëriti qëndrimin e Trump, se paqja, duhe të vendoset përmes forcës.
Discussion about this post