Uashingtoni ka marrë një listë kushtesh për zgjidhjen e konfliktit me Rusinë nga Kievi, sipas të dërguarit special të Presidentit të SHBA-së, Donald Trump për Ukrainën, Keith Kellogg.
“E morëm nga pala ukrainase”, tha Kellogg në një intervistë me Fox News, duke shtuar se Uashingtoni po pret një dokument të ngjashëm nga Moska, në mënyrë që më vonë t’i kombinojë ato në një tekst të vetëm.
Sipas Kellogg, pasi të përpunohen dokumentet e Ukrainës dhe Rusisë, do të mbahet një raund i ri negociatash. I dërguari special beson se kjo mund të zhvillohet në Gjenevë, pasi Rusia po refuzon të mbajë një raund të ri konsultimesh në Vatikan.
“Mendoj se Gjeneva mund të jetë ndalesa e radhës, ku do të jenë të pranishëm të tre udhëheqësit e palëve: Presidenti i SHBA-së, Donald Trump, Presidenti i Rusisë, Vladimir Putin, dhe Presidenti i Ukrainës, Volodymyr Zelensky. Ne do të donim ta mbanim atë në Vatikan dhe ishim pothuajse gati për këtë, por rusët nuk donin të shkonin atje. Prandaj, besoj se opsioni tjetër do të jetë Gjeneva”, tha i dërguari i posaçëm.
