Këngëtarja e njohur Silva Gunbardhi do të njoftonte pak ditë më parë për një ndërhyrje kirurgjikale në sy. Vetë ajo i kërkonte të gjithë mbështetësve të saj që të luteshin për të. Operacioni rezulton të ketë shkuar mjaft mirë për këngëtaren dhe tashmë ka hyrë në fazën e rikuperimit.
Vetë ajo në një intervistë për një të përditshme ka rrëfyer edhe atë që ka ndodhur para dhe pas operacionit me mjekët dhe stafin.
“Gjithë kohës me lente në sy. E keni parasysh ndjesinë e vazhdueshme kur të hyn diçka në sy dhe vuan gjithë ditën? Unë kisha mbi 10 vjet me këtë ndjesi”, tha ajo. Ndërkohë ajo ndau me ne dhe një surprizë që i kishte bërë doktori, pas ndërhyrjes. “E dini çfarë më ndodhi? Pagesën e operacionit e kisha bërë me bankë. Por kur shkova pas operacionit për vizitë, doktori më tha: “Silva ke dy opsione, ose të t’i kthejmë mbrapsht paratë, ose zgjidh dikë që ka nevojë për ndihmë e ta ndihmosh me këtë shumë. Unë zgjodha të ndihmoj një fëmijë të vogël sa djali im”.
Pyetjes se sa kishte kushtuar ndërhyrja, ajo iu përgjigj: “Eh, ç’pyet, duhet të punoja shumë për t’i hequr ato para mënjanë!”. Sa i takon jetës private, Silva ka krijuar një familje të bukur me këngëtarin Dafi Derti, dashuri nga e cila erdhi në jetë Dalvi, djali i tyre që bën dy vjeç këtë verë. Historia e tyre lindi gjatë xhirimeve të klipit hit “Të ka lali shpirt”.
Fatmirësisht operacioni ka shkuar mirë jo vetëm për Silvën po edhe për personin tjetër, fëmijën që përfitoi nga zemërgjerësia e saj dhe e Spitalit ku këngëtarja kreu operacionin. (E.K/SHUPLAKA)
