Pas mesazheve kërcënuese në llogarinë e tij në “Facebook” flitet se shkrimtari Agron Tufa është kërcënuar me jetë edhe përmes mesazheve në numrin personal të telefonit.
Burime të Policisë së Tiranës kanë bërë me dije se shkrimtari është paraqitur të shtunën në polici për të bërë një kallëzim penal ndaj shtetasit me iniciale A. B. i cili e ka kërcënuar, referuar burimeve për një gazetë të përditshme.
Nuk dihet nëse ky identitet është identiteti i vërtetë i të kallëzuarit penalisht, por pas kallëzimit përpara Seksionit të Krimeve ndaj Jetës, ka nisur hetimi konkret. Menjëherë është regjistruar procedimi penal “kanosje: dhe “përdorim me keqdashje të thirrjeve telefonike”.
Burime të policisë janë shprehur më tej se sipas shkrimtarit Agron Tufa këto kërcënime vijnë pas ndërmarrjes nga ana e tij të nismës për ndalimin me ligj të filmave propagandistike komuniste të regjimit të ish-dikatorit Enver Hoxha.
Kujtojmë se gjatë kësaj periudhe, ai është përfshirë në një debat të ashpër me shkrimtaren Diana Çuli mbi pushkatimin e shkrimtarit Genc Leka.
(XH.A/SHUPLAKA)
