Pasi BDI nuk pranoi të bënte koalicion me Nikolla Gruevskin, lideri i LSDM-së Zoran Zaev pret dorëzimin e mandatit për të krijuar qeverinë e re.
“Nikolla Gruevski kurrë më nuk do të jetë kryeministër. U dëshmua se Gruevski nuk e ka shumicën për të formuar qeverinë. VMRO-DPMNE dje edhe zyrtarisht humbi mundësinë për të formuar qeverinë. Maqedonia nuk ka kohë për të humbur, proceset demokratike kanë filluar, dhe atë e kanë zgjedhur qytetarët. Pres që Ivanovi të ma dorëzojë mandatin. Të gjitha opsionet e tjera do të shkelin Kushtetutën.”, tha Zaev në një konferencë për shtyp.
Ndërkohë lideri i LSDM-së, shtoi se Maqedonia nuk ka kohë për të humbur dhe pret që presidenti Ivanov t’i dorëzojë mandatin, në të kundërt ai do e gjejë vetë një zgjidhje.
“Qytetarët zgjodhën ndryshime. Patjetër të formohet Qeveri e cila do t’i përfaqësojë interesat e qytetarëve. Na duhet Qeveri stabile dhe të përgjegjshme e cila do të udhëheqë politikë reale. Ajo është afrim në rrugën euro-atlantike. Ne do t’i zbatojmë reformat e Përzhinës dhe reformat e Pribesë. Qeveria jonë do të garantojë se pavarësisht ndarjes politike apo nacionale, do të jenë të barabartë. Këtë ua kemi premtuar qytetarëve. Maqedonia është e pjekur për politika të reja dhe reale në interes të qytetarëve… Nëse Ivanov s’na jep mandatin, ka zgjidhje. Ndryshimet do të ndodhin dhe unë pres që sa më shpejt të ma jep mandatin Ivanov. Nëse atë e bën, ajo është kundër-kushtetuese”, tha Zaev.
Zaev foli edhe për platformën shqiptare, për të cilën u shpreh se kishte një qëndrim të cilin do ta shprehte më vonë.
“Kemi qëndrim thelbësor edhe për Platformën Shqiptare. Shpresoj se do ta fitojmë mandatin që menjëherë t’i themi qëndrimet tona. Ne kemi punuar për një shoqëri për të gjithë. Qëndrimi ynë është qytetari për në Qeverinë e re. Jemi pozitiv në këtë aspekt. Nëse na jepet mandati do t’i hapim për diskutim çështjet”, tha Zaev.
