Pasi prokuroria kërkoi 1.6 vite burg për shtetasin Turk Selami Simsek, i cili u arrestua pak muaj më parë në aeroportin e Rinasit nga autoritetet shqiptare, gjykata ka marrë sot vendimin.
Gjyqtari Ahmet Metaliaj vendosi deklarimin fajtor për “falsifikim të pasaportave dhe vizave dhe dënimin e Selami Simsek me 18 muaj burgim. Me gjykim të shkurtuar ulet me 1/3 dhe përfundimisht dënohet me 12 muaj.”
Duke qënë se Simsek ka bërë 10 muaj paraburgim, gjykata ka vendosur që dënimi të fillojë që nga koha e arrestimit dhe shtetasit turk i ka mbetur edhe një muaj burg.
Pak ditë më parë shtetasi turk Selami Simsek, kërkoi azil në vendit tonë pasi në vendin e tij ndihej i rrezikuar.
“Këtë kërkesë e paraqes pranë zyrës së Kufirit dhe Migracionit Tiranë, që të fillojë procedura në emrin tim sa më shpejt të jetë e mundur, për azil. Këtë kërkesë e paraqes për shkak se në Turqi, shteti mendon që unë jam anëtar i Lëvizjes Gulen, dhe mendoj se atje mund t’i nënshtrohem veprimeve keqtrajtuese”, shkruan Simseku në letrën drejtuar Zyrës shqiptare të Emigracionit.
Simseku është arrestuar në të njëjtën ditë me Harun Çelik, mësuesin e dëbuar nga Shqipëria pak javë më parë, në përpjekje për të udhëtuar me vizë false, tranzit, nga Rinasi drejt Kanadasë. Mirëpo çështja e tyre është ndarë.
Discussion about this post