Pak para nisjes së mbledhjes së Këshillit Bashkiak të Tiranës, kreu i këshilltarëve të djathtë Leonard Olli, në një deklaratë për mediat ka reaguar shumë ashpër ndaj vendimit të këshilltarëve të LSI-së, për të marrë pjesë në mbledhjen e sotme.
Më herët, këshilltarët e PD-së i bënë thirrje atyre të LSI-së që të bashkoheshin për të bojkotuar mbledhjen e sotme, pasi në këtë mënyrë Veliaj, nuk do siguronte votat për të miratuar rritjen e çmimit të ujit.
“Më lejoni të deklaroj se për fat të keq vijon të bëjë pazare me pushtetin, më e keqja është se i bën në emër të opozitës por provat tregojnë se vetëm opozitë nuk është, sepse publikisht i kërkuam mosprezencën, ç’ka do bënte të pamundur votimin.
Është veprim i turpshëm, më vjen keq por është një pazar që vijon të zhvillohet në emër të opozitës. Thirrja që i bëjmë në mënyrë shumë të sinqertë për të bllokuar këtë vendim, ishte thjesht një mekanizëm që do bllokonte këtë vendim, por mesa duket LSI e vendosi të jetë përfundimisht pjesë e pazarit në emër të opozitarizmit.
PD e ka deklaruar pa asnjë hezitim votën kundër, nuk ka qenë qëndrim politik por në dobi të interesit të qytetarëve. Ne jemi të bashkuar, do jemi pjesë e debatit në sallën e Këshillit bashkiak, por ne duhet të denoncojmë aktin që po kryhet.
Po diskutohen pazaret e fundit, ky vend do mbetet pre e oligarkisë. Kjo ngritje nuk mund të bëhet sepse është abuzim dhe vjelje e pastër. Nuk mund të ngresh tarifën e këtij shërbimi. Jam këtu për të dëshmuar këtë akt pabesie të këshilltarëve të LSI-së ndaj qytretarëve të Tiranës.”, deklaroi Olli. (D.D/Shuplaka)
Discussion about this post