Këshilltarët e Partisë Demokratike u larguan nga mbledhja e sotme në Këshillin bashkiak, e cila nisi rreth 50 minuta me vonesë, për shkak se ishin kundër rritjes së çmimit të ujit të pijshëm.
Pas largimit të tyre, kryebashkiaku Erion Veliaj tha se kjo nuk është një betejë mes së djathtës dhe të majtës, por mes frikacakëve dhe guximtarëve, duke ironizuar kështu këshilltarët që sapo ishin larguar.
“Dua t’i uroj sukses anëtarëve të rinj të Këshillit Bashkiak. Pasi do marrin vendime të rëndësishme për qytetin. Beteja nuk është mes të majtës dhe të djathtës, por mes frikacakëve dhe guximtarëve. Shikoni si ka ndryshuar Tirana sot, falë vendimeve të guximshme.
Sot kam një lajm të mirë, ne do të aprovojmë 1000 kredi të buta për 1000 apartamente në Tiranë. Një ëndërr që e kemi patur bashkë, kur financat i kishim të rrënuara, thamë që në momentin e parë që ne do rregullonim financat, do hapnim kreditë e buta, që ky qytet t’u thotë çifteve të reja, mirësëredhët në qytet. Problem në Tiranë nuk janë banesat pa leje,” tha Veliaj.
Kujtojmë se këshilltarët demokratë kanë deklaruar se janë kundër vendimit të Veliajt për të rritur çmimin e ujit të pijshëm në kryeqytet, ndërsa kanë deklaruar se do bojkotojnë mbledhjen.
Ndërkohë këshilltarët e LSI-së i kanë propozuar Veliajt që në rast të rritjes së çmimit të ujit, të bëhet rimbursim i familjeve në nevojë si edhe diferencim i bizneseve. Në media u njoftua se Veliaj i kishte pranuar këto propozime, mirëpo këshilltarja e LSI-së Eriona Bixha, deklaroi se Veliaj nuk u kishte kthyer një përgjigje me shkrim.
Në mbledhjen e sotme pritet të miratohet edhe lista me rreth 1 mijë emra të personave që përfitojnë kredi të buta nga Bashkia e Tiranës. (D.D/Shuplaka)
