Fundjavë e nxehtë ka qenë kjo e fundit për zhvillimet politike në vend, ku padyshim që ndryshimet në qeverisje zunë vendin kryesor. Jo pak po katër ndryshime në qeverisje të bëra nga Rama. Katër ministra largohen dhe katër të tjerë emërohen vetëm 3 muaj para zgjedhjeve. Duhet thënë se shumë u përfol që shkarkimi i Tahirit ishte dhe pika më e debatueshme, pasi që u mendua se kjo ishte një kërkesë e hershme e Kryetarit të Parlamentit Meta.
Ndërkohë i pyetur nga Blendi Fevziu, nëse Ilir Meta kishte dijeni për shkarkimin e ministrit të Brendshëm të Saimir Tahirit, analisti, njëherësh edhe këshilltari i Kreut të Kuvendit, Lorenc Vangjeli, është shprehur se Meta nuk ka patur dijeni për këtë ndryshim në qeveri.
Sipas Vangjelit ndryshimet në qeveri i kanë kapur të gjithë në befasi, edhe opinioni publik po ashtu edhe opozitën. “Mesa kuptohet edhe Meta nuk ka qenë në dijeni. Ishin ndryshime të paparalajmëruar. U zu në befasi opinioni publik edhe aktorët kryesor politikë”.
Sipas Vangjelit ky ndryshim i kabinetit nuk është bërë në kushtet e presionit nga Ilir Meta, por po ashtu nuk ka patur një ndikim në këtë lëvizje as opozita. Vangjeli tha se Rama sipas lajmeve që kanë qarkulluar, të njëjtin diskutim Rama ka patur edhe me dy ministrat e tjerë, ku bëhet fjalë për Bushatin dhe me Nikollën.
