Presidenti i Ukrainës, Volodymyr Zelensky, ndodhet aktualisht në Vilnius, Lituani, ku merr pjesë në samitin e udhëheqësve të vendeve lindore dhe nordike anëtare të NATO-s.
Në fjalimin e tij, Zelensky ka theksuar se ekziston një “mundësi reale për të provuar t’i japim fund luftës”, duke e përshkruar këtë moment si një fazë të veçantë në konfliktin me Rusinë.
Ai shtoi se agresori rus po detyrohet të angazhohet në diplomaci për shkak të presionit të ushtruar nga forcat ukrainase dhe mbështetja ndërkombëtare. “Rusia duhet të ndiejë rëndësinë e humbjeve të saj, sepse kjo është ajo që do ta shtyjë atë drejt diplomacisë,” theksoi Zelensky.
Presidenti ukrainas falenderoi partnerët perëndimorë për “çdo investim në prodhimin e armëve”, duke nënvizuar se Evropa dhe Amerika së bashku kanë “armë më të mira se Rusia”. Ai u shpreh optimist për “zgjidhjet më të forta taktike” të Ukrainës, duke përmendur sulmin e suksesshëm të fundit me dronë në bazat ushtarake ruse, nën emrin “Operacioni Rrjeta e Merimangës”.
Samiti i Vilniusit synon të forcojë bashkëpunimin dhe mbështetjen ndaj Ukrainës, ndërsa lufta në territorin ukrainas vazhdon të jetë një nga sfidat më të mëdha të sigurisë në Evropë.
