”Killeri” grek nën hetim dhe për dy vrasje të tjera, hyn në lojë dhe Policia greke

Shtetasi grek që dyshohet se ka ekzekutuar Devi Kasmin mendohet të jetë i përfshirë dhe në dy vrasje të tjera.  

Efthymiou Efthymious mendohet të jetë përfshirë në vrasje të tjera të cilat kanë ndodhur rreth dy vite më parë. Autoritete greke i kanë kërkuar të dhëna Policisë shqiptare.

Burime për ‘’Fax News” bëjnë me dije se njëra nga vrasjet dyshohet të ketë ndodhur në Athinë, ndërsa viktimë ka qenë një shqiptar. Po ashtu ai dyshohet të ketë vrarë dhe një biznesmen grek. 

Në lidhje me vrasjen e Kasmit shtetasi grek nuk e ka pranuar akuzën, madje ka këmbëngulur se nuk ka të bëjë fare me ngjarjen në fjalë.

Gjatë dëshmisë së tij në Polici, ai ka pranuar njohjen me Aurel Hoxhallarin, ndërsa ka saktësuar se njohja e tyre ka ndodhur gjatë kohës kur Hoxhallari ka qenë emigrant në Greqi.

“Kam ardhur disa herë në Shqipëri. Nuk kam asnjë lidhje me vrasjen. Aurelin e njoh që kur kishte ardhur emigrant në Greqi. Kam qëndruar disa herë tek shtëpia e Aurelit në Mezëz”, ka qenë kjo një pjesë e dëshmisë së tij përpara hetuesve.

(E.K/FAXWEB)