Ambasadorja amerikane Yuri Kim ka bërë një reagim të pazakontë në Twitter, duke bërë replikë me një shkrim të ”lexo.al”, ku citohej gazetari Çim Peka, i cili thoshte se mes diplomates dhe Bashës kishte pasur një përplasje.
“Kjo është e pakuptimtë. Ai më quan “Yuri” dhe unë e quaj “Luli”. Pse? Sepse ne jemi kolegë dhe miq”, shkruan Kim në Twitter.
Gazetari Çim Peka tha mbrëmjen e djeshme se Basha i ka bërë të qartë diplomates amerikane se ai nuk është “Luli Basha” por “zoti Basha, kryetar i opozitës”. Më tej, siç citonte gazetari, Basha ka akuzuar Kim se është palë me kryeministrin Rama.
“Nga burimet e mia, ose thënë më shkurt nga burimet pranë një medie që informohet nga Ambasada Amerikane shumë shpesh. Ka pasur një bisedë shumë të acartë, të fortë nga kryetari i opozitës zoti Basha me ambasadoren e SHBA Yuri Kim, gjatë drekës.
Me tone shumë të ashpra. Ku zoti Basha i ka bërë të qartë ambasadores “unë nuk jam Luli Basha. Unë jam zoti Basha, jam kryetari i Opozitës. Nëse vazhdoni të jeni në lojë me kryeministrin Rama , vazhdoni me të. Një bisedë e ndërtuar më shumë si një pretencë ndaj ambasadores sesa si ndërmjetëse”, ka thënë gazetari Çim Peka. (E.K/Faxweb.al)
Discussion about this post