Joel Le Scouarnec, ish-kirurgu i cili ka pranuar abuzimin seksual me qindra pacientë, kryesisht fëmijë, midis viteve 1989 dhe 2014, është dënuar me 20 vite burg.
Le Scouarnec ishte veshur me të zeza ndërsa qëndronte pa emocione në gjykatë duke dëgjuar gjyqtaren Aude Burési të jepte vendimin. Ai i kishte pranuar akuzat në mars.
Gjyqtarja Burési tha se gjykata kishte marrë parasysh faktin se ish-kirurgu kishte kërkuar veçanërisht viktima të sëmura dhe të cenueshme.
Le Scouarnec, 74 vjeç është tashmë në burg pasi u dënua në vitin 2020 me 15 vjet burg për përdhunimin dhe sulmin seksual ndaj katër fëmijëve, përfshirë dy nga mbesat e tij.
Ish-mjeku ka qenë në gjyq që nga fundi i shkurtit.
Gjatë asaj kohe, dhjetëra viktima të tij kanë dëshmuar, duke i treguar gjykatës se si abuzimi që kanë përjetuar fëmijë u ka ndikuar në jetë.
Në mars, gjatë një seance të mbajtur me dyer të mbyllura, Le Scouarnec pranoi se kishte abuzuar seksualisht me të 299 viktimat, shumë prej tyre ndërsa ishin nën anestezi ose zgjoheshin pas operacioneve.
Ai mbante ditarë në të cilët përshkruante sulmet me detaje grafike, gjë që i lejoi policisë të gjurmonte viktimat e tij – shumë prej të cilëve nuk kishin kujtime për abuzimin që pësuan ndërsa ishin nën kujdesin e Le Scouarnec.
“Nuk mund ta shoh më veten në të njëjtën mënyrë sepse jam pedofil dhe përdhunues fëmijësh”, tha Le Scouarnec gjatë deklaratave të tij të fundit në gjykatë javën e kaluar.
“Janë thënë shumë gjëra. Nuk i mbaj mend domosdoshmërisht të gjitha tani. Pa dyshim që do të më kujtohen kur të jem në qeli, por ajo që kam parë [në gjykatë] është vuajtja për të cilën jam përgjegjës”, tha ai.
Ai shtoi se as nuk donte dhe as nuk priste që të merrte ndonjë masë të butë.
Më herët këtë muaj, ai tha gjithashtu se ishte “përgjegjës” për vdekjen e dy viktimave, të afërmit e të cilave thonë se vdiqën nga vetëvrasja, pas traumës së sulmit seksual nga Le Scouarnec kur ishin fëmijë.
Gjyshërit e njërit prej tyre, Mathias Vinet, i cili vdiq katër vjet më parë, i treguan BBC-së për “zbritjen në ferr” që përjetoi nipi i tij kur policia i zbuloi se emri i tij shfaqej në një nga ditarët.
Gjyqi ka shkaktuar zemërim që Le Scouarnec i shpëtoi pa u ndëshkuar për abuzimin për më shumë se pesëmbëdhjetë vjet dhe se atij iu lejua të vazhdonte të trajtonte fëmijët pavarësisht një dënimi në vitin 2005 për shkarkimin e imazheve pedofile.
Grupi kolektiv i viktimave të Joel Le Scouarnec u ankua se gjyqi nuk kishte arritur të tërhiqte vëmendjen e politikanëve dhe shoqërisë në përgjithësi .
“Asnjë mësim nuk është nxjerrë nga kjo, as nga bota mjekësore dhe as nga politikanët”, tha grupi në një deklaratë. Disa viktima mbajtën një protestë para gjykatës përpara se të jepej vendimi të mërkurën pasdite.
Catherine, nëna e një viktime, tha ditën e shpalljes së vendimit se ishte hera e parë që kishte parë kaq shumë gazetarë që mbulonin gjyqin dhe shtoi se ndjente se viktimat ishin harruar.
“Është për të ardhur keq, por shpresa ime është që tani mesazhi ynë të mund të përçohet. Jo për brezin që është lënduar, por për nipërit e mbesat e mia”, tha ajo, duke shtuar se shpresonte që institucionet do të “reagojnë”.
Le Scouarnec, i cili ishte i pranishëm në gjykatë çdo ditë të gjyqit 14-javor, kërkoi falje vazhdimisht për veprimet e tij “të neveritshme”.
