Presidenti në largim i Shteteve të Bashkuara, Barack Obama raportohet se ka paralajmëruar homologun e tij rus, Vladimir Putin se sulmet kibernetike të Moskës në zgjedhjet presidenciale të 8 Nëntorit në SHBA, mund të çojnë në një konflikt të armatosur mes dy super-fuqive botërore.
Më 31 Tetor Obama ka përdorur linjën emergjente mes Washingtonit dhe Moskës për të paralajmëruar Putinin se, çdo përpjekje për të influencuar zgjedhjet amerikane do të konsiderohet si një “çështje e rëndë”.
Sipas një zyrtari të lartë amerikan, pjesë e mesazhit transmetuar Rusisë ka qenë: “Ligji ndërkombëtar, duke përfshirë ligjin për konfliktin e armatosur, aplikohet edhe për veprimet në kibernetikë”, shkruan sot e përditshmja britanike “Express”, ndërsa amerikanja “NBC News” ka raportuar se Obama përdori shprehjen “konflikt i armatosur” gjatë bisedës telefonike.
Shtëpia e Bardhë mori vendimin historik për të përdorur linjën e emergjencës për herë të parë gjatë presidencës së Barack Obamës, teksa zyrtarë të shumtë të inteligjencës pretendonin se, përdorimi i linjës emergjente tregonte se situata ishte me të vërtetë serioze. Linja e emergjencës është përdorur vetëm gjatë sulmeve terroriste të 11 shtatorit në “World Trade Center” në[ New York dhe dita kur trupat amerikane hynë në Bagdad.
James Stavridis, ish kreu i NATOS-s, tha: “Është një hap dramatik të ngresh atë telefon dhe ta përdorësh”.
Një ditë më parë, gazeta e njohur britanike “Daily Star”, raportoi se, SHBA po planifikon një sulm të madh hakmarrje në Rusi para se Donald Trump të marrë postin e presidentit më 20 janar. (A.R/SHUPLAKA)
Discussion about this post