Këngëtarja, Yulia Samoilova do të përfaqësojë Rusinë në Eurovizion këtë vit.
“Flaka po digjet” titullohet kënga e ruses e cila do të jetë pjesë e Eurovizionit, që mbahet në datat 9,11 dhe 13 maj në Kiev.
Këngëtarja sivjet feston 28 vjetorin dhe është në karrocë me rrota që kur ishte shume e re, raportojnë mediat ruse.
Rusia ka vendosur që mos i mungojë garës muzikore europiane këtë vit, edhe pse festivali mbahet në Ukrainë. Pavarësisht tensioneve mes dy shteteve Rusia vendosi të marrë pjesë në garë.
Festivali i Eurovizionit është i njohur si festival i cili mbahet çdo vit për të bërë bashkë njerëzit si provë që muzika mund t’i bëjë ballë politikës dhe të bashkojë njerëzit.
Ukraina, vendi i cili do të jetë mikpritës i festivalit sivjet, ka akuzuar Moskën për armatimin e rebelëve separatistë në rajonin Donbas të Ukrainës. Konflikti atje deri më tani ka marrë rreth 10 mijë jetë në këto tri vite. Rusia akuzon forcat ukrainase për shënjestrim edhe të civilëve në Donbas. Pastaj është edhe çështja e Krimesë: Moska aneksoi gadishullin nga Ukraina në vitin 2014.
Në mes të gjithë kësaj, ka pasur thirrje edhe për bojkotim të festivalit Eurovizion në Kiev. Këtë javë Deputeti i Kuvendit Rus, Vitaly Milonov kërkoi nga drejtori i kanalit One TV që të tërhiqen nga konkurrenca.
Në një intervistë për BBC-në ai pohoi se “shumë rusë” e përkrahin thirrjen e tij. Ai e akuzoi Ukrainën për mbështetje të “krahut të djathtë të banditëve fashistë”, dhe propozoi që Eurovizionit në Kiev ti drejtohen me “Reich-vision”. Duke aluduar se përkrahja e Eurovizionit do të ishte e njëjtë si “përkrahja e Lojërave Olimpike fashiste të vitit 1936 në Berlin”. (M.D/ Shuplaka)
https://www.youtube.com/watch?v=5cNnlSF5LBQ
Discussion about this post