“Kjo nuk është diplomaci leshi, por politikë e keqe!”, si e komenton Manjani deklaratën e ambasadores Sakiqi

Ylli Manjani në ndryshim nga kryeministri Rama që e gjen fajin e mungesës së investimeve të huaja në Shqipëri te diplomacia e leshtë, e sheh problemin te politika e keqe. E si shembull të kësaj merr deklaratën e ambasadores shqiptare në Holandë.

“Nga një reagim delirant i Ambasadores, rrezikojmë seriozisht vendosjen e vizave! Kjo nuk është diplomaci leshi, por politikë e keqe!”, shkruan Manjani.

Adia Sakiqi përveçse mohoi raportin e Policisë Holandeze që kërkoi rikthimin e vizave për shqiptarët, shkoi më tej duke i kujtuar shtetit ku është ambasadore se një pjesë e turistëve tërhiqen atje për shkak të lëgalizimit të prostitucionit.

Në një kohë që priteshin hapa konkretë sesi të bindim Holandën që të mos vendos për heqjen e vizave për shqiptarët, reagimi i ambasadores duket vërtet i pavend.

(E.K/SHUPLAKA)