”Arrest me burg” në mungesë për Klement Balilin, i cili që prej mesnatës së sotme është në kërkim.
Burime të sigurta për ”Shuplaka”-n thonë se me kërkesë të prokurorit Ened Nakuçi, Gjykata e Krimeve të Rënda i ka caktuar masën e sigurisë ”arrest me burg” në mungesë me akuzën e trafikut të drogës, në kuadër të grupit të strukturuar kriminal drejt Greqisë dhe Italisë dhe më pas në vendet drejt Bashkimit Europian.
Mësohet se vendimi i masës së sigurisë i është dërguar për ekzekutim policisë së shtetit. Policia, nga sa është raportuar është vënë në lëvizje në orët e para të mëngjesit, duke kontrolluar shtëpitë e familjes së Balilit në Sarandë, Delvinë dhe fshatrave për rreth.
Ky grup dyshohet se funksiononte prej kohësh dhe dërgonte sasi të mëdha droge në Greqi e Itali dhe nga andej në Belgjikë te dy vëllezërit Poti të arrestuar atje që bënin shpërndarjen nëpër vende të ndryshme.
Te Krimet e Rënda nuk është paraqitur ende ndonjë avokat i zgjedhur nga Balili apo familja e tij për të mbrojtur interesat e të dyshuarit shpallur në kërkim, apo për ankimimin e masës së arrestit./ Valmora Gogo-SHUPLAKA
Discussion about this post