Policia e Dibrës, në kuadër të operacionit antidrogë të koduar “Pritja”, ka bërë të mundur kapjen dhe arrestimin e një shtetasi të shpallur në kërkim, duke e çuar në dy numrin e të arrestuarve në këtë operacion.
Si rezultat i administrimit të shpejtë të informacioneve të siguruara në rrugë operative dhe në bashkëpunim me Forcën e Posaçme Operacionale të DVP Tiranë, u kap dhe u vu në pranga:
Edison Ndoja, 29 vjeç, banues në Allias, Tiranë.
Ky shtetas ishte shpallur në kërkim nga Gjykata e Juridiksionit të Përgjithshëm Dibër, për veprën penale “Prodhimi dhe shitja e narkotikëve”.
Operacioni “Pritja” është një ndër veprimtaritë e shtrira të Policisë për goditjen e rrjeteve kriminale që merren me trafikimin dhe shpërndarjen e lëndëve narkotike.
Policia bën me dije se vijon puna për identifikimin dhe kapjen e personave të tjerë të përfshirë në këtë veprimtari kriminale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
