Reforma e pensioneve ka rezultuar pozitive dhe ka dhënë frytet e veta sipas Ministrit të Mirëqënies Sociale, Blendi Klosi, megjithatë ai shprehet ende i pakënaqur.
I ftuar në emisionin “Njerëz në Fokus” , ministri u shpreh se kjo ishte një reformë historike në favor të moshës së tretë të cilët ishin lënë pas dore gjatë gjithë këtyre viteve.
Klosi u shpreh se qeveria trashëgoi një sistem pranë kolapsit në 2013-ën, por gjithsesi ia dolën të rikonceptojnë sistemin e pensioneve. Megjithatë ai nuk ndihet i kënaqur, pasi po të krahasohemi me skemat jashtë vendit jemi shumë më poshtë.
“Mendoj që nuk është moment që të jemi kokulur apo krenarë, por kemi shumë për të thënë, trashëguam një sistem në prag kolapsi. Ne kemi bërë një reformë historike për në reformën e pensioneve. Ndryshuam konceptetet nga një skemë pasive në një skemë që shkon në kontribute të gjithsecilit. Po s’jemi të kënaqur nëse krahasohemi me skemat jashtë vendit, por jemi të kënaqur nëse krahasohemi me atë çfarë kishim. 240 ka qenë shuma maksimale. Pavarësisht kontributeve. Tani është hequr tavani. Nëse ke kontribuar shkon në 370 mijë lekë të vjetra.”, tha Klosi.
Ndër të tjera ministri shtoi se nuk do të ketë më rritje me fashë të pensioneve por riindeksim.
“Pensionistët e sotëm kanë vërejtje pasi gjithnjë njerëzit kërkojnë më shumë, por ne kemi ndërmarrë vendime që e kanë përmirësuar situatën. Sistemi i ri i pensioneve ka indeksim, dhe në këto dy vite janë indeksuar të gjitha pensionet, nuk ka pensione që përfitojnë më shumë apo që përfitojnë më pak. Falë këtij indeksimi do të kemi rritjen e pensioneve duke nisur nga viti i ardhshëm. Nuk do të ketë më rritje me fashë të pensioneve. Çdo vit do të ketë riindeksim. Reforma e pensioneve i dha frytet shumë shpejt, dhe tani na dha mundësi të kemi më shumë para në buxhetin e shtetit, dhe kështu i shpërblejmë pensionistët. Në kuadër të kësaj skeme të shëndoshë mund të kemi rritje të shpërblimeve”, deklaroi ministri
Në fund, Klosi u shpreh se kjo reformë për pensionet nuk u bë tani për shkak se po afrojnë zgjedhjet, por ka nisur që më parë dhe frytet po shihen tani. (D.D/Shuplaka)
