Knut Fleckenstein flet për reformën zgjedhore: Qeveria funksionale, PD i ka dyert e hapura

Në takimin e rradhës të zhvilluar sot nga Këshilli Kombëtar i Integrimit Europian pjesë e tryezës ka qenë edhe raporteri për Shqipërinë në Parlamentin Europian, Knut Fleckenstein.

Fleckenstein në fjalën e tij është shprehur i kënaqur me punën e këshillit dhe me qëndrimin e ambasadës amerikane, qëndrim i cili është në të njëjtën vijë me Bashkimin Europian për situatën aktuale në Shqipëri.

Ndër të tjera në lidhje me reformën zgjedhore ai u shpreh se:” Unë e kam shprehur mendimin tim se çfarë po ndodh në këtë parlament dhe nuk dua qe të përsërisë veten. Jam i kënaqur që Palmer kishte të njëjtin mendim me ne. Po ashtu jam i kënaqur që këshilli po vazhdon punën e tij.

Duke pasur parasysh një qeveri funksionale dhe kjo gjë u konfirmua edhe nga SHBA dhe BE, unë jam optimist për progresin, por optimizimi im është një optimizëm i kujdesshëm. Ne si Parlament Europian kemi dyert e hapura si për qeverinë edhe për PD. Ne jemi në mbështetjen tuaj duam që ju të ngrini zërin të flisni qartë, jemi duke ju dëgjuar.”

Gjithashtu Fleckenstein nga tavolina e sotme e Këshillit Kombëtar të Integrimit është shprehur mjaft i zhgënyer nga LSI dhe kryetarja Monika Kryemadhi.

“Nuk dua të nxis më tej tension në situatën e krijuar në Tiranë. Jam i kënaqur që Këshilli Kombëtar po vijon punën e tij. U zhgënjeva shumë nga kryetarja e LSI-së, për arsye se ajo tha vetëm një fjali në fund të takimit. Ata e kanë marrë vendimin e tyre, që në Shqipëri ka nevojë për ndërrim pushteti, dhe në rast se ne nuk e kuptojmë këtë gjë nuk është problemi i tyre. Ky është një mesazh i qartë dhe besoj se ata në Bruksel dhe ata që janë Shqipëri duhet ta kuptojnë se në cilën anë ndodhet secili prej nesh”, u shpreh ai. 

Fokusi i takimit të sotëm është ecuria e Reformës në Drejtësi dhe ngritja e organeve të qeverisjes së sistemit të drejtësisë.

Kujtojmë se në një takim me gazetarët ditën e djeshme, Palmer u shpreh se nuk ishte në Shqipëri për të negociuar zgjidhjen e krizës politike do të ishte fatkeqësi në rast se opozita nuk do të merrte pjesë në zgjedhje.(lexo këtu)

Ndërkohë në një intervistë për Deutche Welle, Fleckenstein pak kohë më parë tha se: “Nuk mund të them nëse kjo është e drejtë apo e gabuar, por di që parlamentarët duhet ta kryejnë punën e tyre në Parlament. Jam i zhgënjyer, që papushim na duhet të flasim për atë që deputetët t’i ushtrojnë apo jo mandatet e tyre”.