Dikur bashkëpunëtore e Ilir Metës, Mesila Doda që tanimë ka kaluar në krah të PDIU-së ka reaguar ashpër ndaj LSI-së dhe kreut të kësaj partie lidhur me deklaratën më të fundit të Manjanit që i bashkangjitet tensionit që ka shkaktuar pikëpyetja që rrethon vazhdimësinë e koalicionit qeverisës.
Në një intervistë që ajo ka dhënë për “Koha Jonë” deputetja e PDIU-së shprehet se Ilir Meta duhet që të reagojë lidhur me deklaratën e ministrit të Drejtësisë, Ylli Manjani, i cili është shprehur së fundmi se e majta i fitoi zgjedhjet me Ben Blushin dhe jo me Shpëtim Idrizin.
Mesila Doda shprehet se ka dijeni për një ftesë që Meta dhe Rama i kanë bërë kreut të PDIU-së, Shpëtim Idrizi për bashkëpunim në koalcion. Ajo thekson se deklaratat të tipit “ku di unë ç’bëj unë” që i gjejmë në librat e Shvejkut nuk mund të kapërdihen më.
“Unë sot i kërkoj kryetarit të LSI, Ilir Meta të shprehet a është dakord me këtë deklaratë të ministrit të tij? Me sa unë jam në dijeni ka qenë një ftesë e bërë nga zoti Meta dhe zoti Rama, në bashkëdakordësi të plotë, bashkëpunimi me PDIU-në në koalicion. Tani, kjo është një kërkesë shumë serioze dhe e përgjegjshme e imja, për të cilën kryetari i PDIU-së nuk do të thotë, siç mund të ndodhë në ndonjë parti tjetër “e kishte nga mendja e saj”. A është dakord Ilir Meta, me këtë deklaratë të ministrit të tij të Drejtësisë, Ylli Manjani? A është i shqetësuar ai për zgjerimin e këtij koalicioni, zgjerim të cilin sipas vetë zotit Meta, e ka propozuar ai personalisht? Deklarata apo veprime që i gjejmë vetëm në librat e Shvejkut të tipit “ku di unë ç’bëj unë”, nuk mund të pranohen apo të kapërdihen më. Të ndajnë me kë janë aleatë e me kë kundërshtarë, kë duan dhe kë nuk duan, sepse edhe opozitarë edhe ministra, edhe të pakënaqur edhe superpushtetarë nuk ka!”, – shprehet Doda. (XH.A/SHUPLAKA)
Discussion about this post