Gjatë muajit dhjetor vajzat dhe gratë në Berat mund t’i drejtohen kabineteve të mamografisë për kryerjen e vizitave falas. Në spitalin rajonal të Beratit tashmë është instaluar edhe një mamografi e re, që garanton shërbime më cilësore dhe rezultate të sakta për gratë dhe vajzat.
Ministrja e Shëndetësisë dhe Mbrojtjes Sociale, Albana Koçiu i bëri apel sot vajzave dhe grave në qytetin e Beratit, që të kryejnë ekzaminimet për kontrollin kundër kancerit të gjirit. “Jo vetëm në Tetor. Këtë muaj, Berati është qyteti që ofron vizita të shpejta, duke lehtësuar hapat. Mamografi pa rekomandim gjatë gjithë muajit. Drejtohu sot spitalit rajonal dhe kryej mamografinë pa humbur kohë”, tha Koçiu.
Ministrja Koçiu u shpreh se “ekzaminimet e rregullta shpëtojnë jetë, duke mundësuar parandalimin dhe zbulimin e hershëm të sëmundjeve”. Gratë mund të kryejnë mamografinë falas nga e hëna deri të premten, nga ora 08:00-20:00, ndërsa të shtunën, orari i vizitave është 09:00-14:00 në Spitalin Rajonal të Beratit.
Ministria e Shëndetësisë dhe Mbrojtjes Sociale për herë të parë ka bërë të mundur që çdo muaj i vitit t’i kushtohet një qarku në Shqipëri, ku gratë mund të kryejnë mamografi pa referimin e mjekut dhe me orare të zgjatura.
Me një fjongo rozë, muaji tetor është kthyer në simbolin e ndërgjegjësimit për më shumë vëmendje dhe kontroll të gjirit për gra dhe burra, për të shpëtuar më shumë jetë.
Por, këtë vit Ministria e Shëndetësisë dhe Mbrojtjes Sociale ka vendosur ta shtrijë fushatën e saj sensibilizuese edhe përgjatë muajve në vijim.
Kontrollet e rregullta janë thelbësore për luftën kundër kancerit.
Discussion about this post