Ministri i Mbrojtjes i Greqisë, Panos Kamenos u shfaq me rroba ushtarake në kufirin me Shqipërinë, duke lëshuar disa deklarata me tone luftarake. Tensioni u rrit akoma më shumë pasi disa ushtarë me origjinë shqiptare bënë simbolin e shqiponjës në kazermën greke.
Ministrja e Mbrojtjes, Mimi Kodheli, në një intervistë për revistën Mapo, ka komentuar edhe qëndrimet e homologut grek.
“Mendoj se në Europë ka një rritje të ndjeshme të partive populiste apo popullore te djathta. Personalisht asnjë ekstrem nuk më rri mirë, qoftë kur flasim për politikë qoftë kur flasim për çdo gjë në jetën e përditshme. Latinët thoshin që “virtyti qëndron në mes” dhe besoj që e mesmja e artë është një gjë që vlen aq më shumë kur flitet për politikën, pa le kur flitet për një politikë si kjo e jona. Unë i kam parë këto veprime, si veprime politikanësh të dëshpëruar e që janë përdorur për konsum të brendshëm politik. Fakti që unë në një mënyrë elegante kam reaguar vetëm me një qëndrim timin në Facebook, shpresoj që i ka bërë kolegët të reflektojnë,” tha Kodheli.
Ajo shtoi se është takuar sërish me Kamenos pas incidenteve: “Po e kam takuar dhe e kam pyetur nëse tashmë është qetësuar dhe janë duke i shkuar mirë punët. Kjo ka qenë pyetja ime retorike për të”.
Deklaratat e tij provokuese ai i ka bërë gjatë ngritjes së postave ushtarake, në kufi me Shqipërinë, një lëvizje që sipas shtypit grek është bërë për të mbrojtur dhe rritur sigurinë e vendit.
Pasi ka folur për një përplasje me Turqinë, Panos Kammenos ka thënë se Forca e Armatosur greke është gati për çdo situatë. Ministri grek i Mbrojtjes ka folur dhe për deklaratat e kryeministrit Edi Rama, në lidhje me çështjen çame. Ai ka thënë se këto janë deklarata për konsum politik.
(M.D/ Shuplaka)
Discussion about this post