Kokaina e kapur në Durrës jehonë në mediat ndërkombëtare: Shqipëria rrugë kalimi, pronari nuk u arrestua

Kapja e 613 kilogramëve të kokainës në portin e Durrësit nga ana e Policisë shqiptare ka pasur jehonë dhe në mediat ndërkombëtare.

Pas reagimit njëzëri të politikës, të ambasadave të BE-së dhe të SHBA-së, si dhe reagimit të antimafias italiane, lajmi është reflektuar dhe në disa prej agjensive më të njohura si ‘’Washington Post”, ‘’Reuters” apo ‘’Fox News”.

‘’Washington post” pasi përshkruan sasinë e kapur dhe atë që Policia ka deklaruar shprehet se Shqipëria është e njohur për faktin se është një udhëkryq për trafikimin e marjuanës.

“Shqipëria dhe njihej më parë si një udhëkryq për trafikimin e marjuanës, por një goditje qeveritare ka çuar në një reduktim të ndjeshëm të numrit të plantacioneve, ndonëse konfiskimet e rregullta tregojnë se trafikantët ende kanë sasi të ruajtura”, thuhet në shkrim.

Po ashtu në shkrim theksohet fakti se pronari i firmës së bananeve, me kamionët e të cilëve transportohej droga nuk u arrit të kapej nga ana e Policisë.

‘’Reuters” shkruan se Shqipëria ndodhet në një presion rë madh nga ana e ndërkombëtarëve për të goditur krimin e organizuar dhe trafikantët e drogës.

“Shqipëria është nën presionin e madh të perëndimit për të rritur luftën kundër trafikimit të drogës dhe formave të tjera të krimit të organizuar, si pjesë e përpjekjes së saj për t’u bashkuar me Bashkimin Evropian.

Shqipëria mbetet një vend burimim i rëndësishëm për marjuanën, si dhe një rrugë tranziti për kokainën dhe heroinën për tregjet evropiane, tha Departamenti Amerikan i Shtetit”, shkruan Reuters.

Po ashtu media amerikane ‘’Fox News” ka pasqyruar lajmin duke ritheksuar faktin se Shqipëria është një rrugëkalimi për trafikimin e drogërave nga Kolumbia drejt vendeve të Europës Perëndimore.

(E.K/FAXWEB)