Ish-deputeti socialist Koço Kokëdhima është i shqetësuar për vendimin e italianëve lidhur me mbylljen e Call Center-ave në Shqipëri. Për të 25 mijë të rinj që do dalin të papunë, për kushtet që ne kemi, është vërtetë një tragjedi.
Mirëpo biznesmenit të njohur i është dukur e çuditshme edhe kapja jonë në befasi për këtë ligj duke komentuar: ‘’Më bën pershtypje kapja në befasi e Tiranës nga ky ligj vrastar për ne’’.
‘’Me ligjin e ri që miratoi parlamenti Italian, pronarët e call center-ave mund të bëjnë biznes vetëm në BE.
Kështu, 25 mijë të rinj e të reja shqiptarë, të punësuar në call center do dalin të papunë. Për kushtet që kemi ne, kjo është një tragjedi. Vitin e ardhshëm ekonomisë tonë dhe këtyre vajzave e djemve do tu mungojnë rreth 150 milionë dollarë. Në Shqipëri kanë dështuar plotësisht politikat e qeverive të tranzicionit për të ndërtuar një ekonomi reale dhe një treg pune të qëndrueshëm. Ne nuk eksportojmë produktet tona, por thjesht eksportojmë në mënyrë direkte ose indirekte krahë pune.
Më bën pershtypje kapja në befasi e Tiranës nga ky ligj vrastar për ne. Është dashur,që kjo çështje të bëhej e njohur dhe të negociohej qysh në fillim, qysh në nisje të procesit të hartimit të këtij ligji, muaj e ndoshta vite më parë. Bëhet gjithë ky aktivitet me BE, vajtje-ardhje, takime, negociata, konferenca, plane e bisedime. Në krye të gjithë diskutimeve, gjatë gjithë këtij viti, duhet të ishte mbrojtja e punës së këtyre të rinjve e të rejave.
