Koço Kokëdhima takim kokë më kokë me Ilir Metën. Kokëdhima i lëvizjes ”Zgjidhja” brenda PS-së është duke folur ballë përballë me kreun e LSI-së Ilir Meta.
Prej 45 minutash Kokëdhima dhe Meta kanë diskutuar lidhur me zhvillimet e fundit politike dhe situatën delikate të krijuar nga protesta e opozitës dhe këmbëngulja për të mos hyrë në zgjedhje. Gjatë takimit u diskutua për situatën politike, për tejkakimin e krizës politike në vend dhe për gjetjen e rrugëzgjidhjeve pas situatës së krijuar nga protesta opozitës që ka nisur prej 18 shkurtit dhe nga bllokimi i parlamentit. Temë diskutimi ishte edhe ngecja e reformës zgjedhore, ndërsa partitë po përgatiten për zgjedhjet parlamentare të 18 qershorit.
Meta e ka bërë të qartë se zgjedhjet e qershorit nuk mund të kuptohen pa opozitën, edhe pse LSI-ja u regjistrua si subjekt politik në KQZ, po kështu edhe Kokëdhima ka deklaruar se protesta e opozitës duhet parë me shqetësim.
Kokëdhima, ka deklaruar se pa opozitën nuk shkohet në zgjedhje, por në luftë, duke i bërë thirrje shumicës së majtë dhe opozitës së djathtë që të ulen në bisedime dhe të zgjidhin krizën.
Që kur nisi kriza politike me protestën e opozitës në “çadrën e lirisë” në bulevardin ‘Dëshmorët e Kombit”, Kokëdhima ka takuar disa krerë partish, si atë të PAA-së, Agron Duka apo atë të PSD-së, Skënder Gjinushi, për të shkëmbyer pikëpamje rreth situatës politike dhe kapërcimit të krizës.
Nuk dihet nëse Kokëdhima do të dojë të bashkëpunojë me Metën për gjetjen e një zgjidhjeje, por kujtojmë se atij i është hequr mandati i deputetit dhe u shkarkua nga grupi parlamentar i PS-së duke krijuar një krisje të madhe edhe në raportet me Edi Ramën.
Muaj më parë, para se Kokëdhima të krijonte ”Zgjidhje”-n, ra në sy një takim mes tij, Metës dhe socialistit të vjetër Rexhep Mejdani. Meta ende nuk ka folur qartë nëse do të hyjë në zgjedhje dhe nëse aleat i tij në koalicion do të jetë Edi Rama, ndërsa një nga opsionet është edhe dalja më vete. (V.G/SHUPLAKA)
Discussion about this post