Kokëdhima: Ndalimi i Haradinajt është i paligjshëm, njollos luftën e drejtë dhe çlirimtare të UÇK-së

Për arrestimin e kreut të AAK-së ka reaguar edhe Koço Kokëdhima. Sipas tij lirimi i Haradinajt është një nderim për sakrificat e Kosovës. “Ndalimi i kreut të Aleancës për Ardhmërinë e Kosovës, Ramush Haradinaj nga autoritetet franceze, është një akt i papranueshëm që jo vetëm cënon lëvizjen e lirë të autoriteteve të Kosovës, sipas urdhërarresteve të paligjshme të Serbisë, por edhe njollos luftën e drejtë dhe çlirimtare të UÇK-së e të popullit të Kosovës kundër zgjedhës serbe”, shkruan ai.

Më tej Kokëdhima shton se ndalimi i Haradinajt është i paligjshëm pasi ai u shpall dy herë i pafajshëm për të gjitha akuzat për krime lufte nga Gjykata Ndërkombëtare për Krime Lufte në Ish-Jugosllavi, ku ai u dorëzua vullnetarisht për t’u përballur me akuzat e montuara të autoriteteve serbe.

“Ashtu si në rastin e ndalimit të tij nga autoritetet sllovene, pesë vite më parë, unë besoj se drejtësia franceze do të vendosë sot lirimin e z.Haradinaj, si një gjest politik që vërteton mbështetjen e vendeve të BE-së për perspektivën europiane të Kosovës dhe nderon sakrificat e shumta të popullit të Kosovës për të qenë i lirë dhe i pavarur”, përfundoi ai. (J.V/Shuplaka)