Ish-deputeti Koço Kokëdhima, në një intervistë me gazetarin Çim Peka, ka folur për marrëdhëniet e tij me kryeministrin Rama.
Në bisedë e sipër, Kokëdhima ka pranuar se e ka mbështetur Ramën të zhvillohet politikisht.
“Unë e kam mbështetur Edi Ramën në karrierën e tij politike, jo i nisur nga ato, nga ndonjë ide për një lojë miqsh, por unë kam qenë afër PS, kam qenë shumë afër gjithë zhvillimeve sepse unë kam qenë një i majtë i shpallur dhe socialist i shpallur.
Dhe duke qenë afër, përmes shtypit tim, kam demonstruar qëndrimet e majta dhe ato politika të cilat kemi besuar se i bëjnë mirë progresit të së majtës. Këtë gjë do e bëj edhe sot dhe në të ardhmen sa të jetoj dhe të kem aktivitet politik dhe mediatik.
Do të mbetem një figurë në mbështetje dhe në zhvillim të së majtës. Nga kjo pikëpamje nuk ka asnjë çudi sepse unë kam qenë afër këtyre zhvillimeve dhe kemi mbajtur qëndrime edhe në mbështetje të Edi Ramës.”, tha ish-deputeti.
Megjithatë ai ka shtuar se shkarkimin nga detyra në PS do ta hedhë në gjyq. “Me Ramën mund të shihemi në gjykatë”, ishin fjalët e tij.
Por i pyetur nga gazetari nëse Ramën e ka mik, Kokëdhima shprehet se në politikë e kishte bërë të qartë distancën mes miqve dhe armiqve, pasi ai aty është për njerëzit e thjeshtë. Ai shton se nuk i uron të keqen askujt dhe nuk përfshihet në luftra personale. (D.D/Shuplaka)
