Koço Kokëdhima, kreu i ”Zgjidhjes” komenton sondazhin e Gallup-it, duke thënë se është medalja e turpit për këtë klasë politike.
”Bojkotoni zgjedhjet e 25 Qershorit!”, bën thirrje Kokëdhima.
”Sot, 56 për qind e shqiptarëve duan të largohen nga vendi, po aq sa në Haitin e shkatërruar nga keqqeverisja dhe tërmeti. Është ironi e fatit të “luftosh” me Haitin për vendin e dytë në botë për të rriturit që duan të ikin në emigracion. Atje, si në kohën e diktatorit Dyvalje, njerëzit e thjeshtë tentojnë dëshpërimisht që të ikin me varka si refugjatë në SHBA. Ashtu si shqiptarët që nuk kanë lënë mënyrë pa përdorur që të ikin si azilantë ekonomikë në Europë. Kjo është medalja e turpit për këtë qeveri. Në 44 muaj ajo ia arriti që t’i bëjë shqiptarët që të vetmen shpresë të kenë ikjen nga sytë këmbët. Këtu, të lumtur janë vetëm një grusht njerëzish, kryetarët e partive dhe oligarkët rreth tyre. Ndaj ne i kemi shpallur lufte pa kompromis kësaj kaste sunduese që do të ishte e lumtur edhe sikur vendi të zbrazej plotësisht nga rinia, njerëzit e ndershëm e të zotë dhe forcat e afta për punë. Që të mos përfundojmë në këtë skenar apokaliptik për Shqipërinë, Partia ZGJIDHJA kërkon reagim nga të gjithë qytetarët, të bojkotojmë masivisht zgjedhjet e 25 qershorit, t’i japim një mesazh të qartë refuzimi kësaj elite politike që nuk përtërihet: Bojkoto Zgjedhjet që Vidhen, Refuzo Listat e Kryetarëve, Përmbys Oligarkët e Korrupsionit, Jo Konçensioneve Antikombëtare, Mjaft me Gënjeshtrat e Politikanëve, Mos Lejo Braktisjen e Vendit, Rrëzo Tiraninë e Skamjes dhe Krimit, Shtet Për Popullin.
Vetëm kur të përmbushim këto kërkesa në Shqipëri do fillojë të ketë vend dhe të ardhme të pranueshme për popullin! Nëse je i shtërnguar nga represioni qeveritar të marresh pjesë në zgjedhje, vendos nje Z të madhe mbi gjithë fletën e votimit që ta kthesh atë në një votë të qartë refuzimi!”, shpjegon ish-deputeti socialist. (V.G/SHUPLAKA)
Discussion about this post