Kolegji i Posaçëm i Apelimit ka lënë në fuqi shkarkimin nga detyra të gjyqtares së Gjykatës së Rrethit Gjyqësor Pukë, Flutura Hoxha. Komisioni i Pavarur i Kualifikimit shkarkoi nga detyra gjyqtaren e Gjykatës së Rrethit Gjyqësor Pukë, Flutura Hoxha, më 25 shkurt 2022, pasi konstatoi mosdeklarim dhe mungesë të burimeve për pasuritë e prindërve. Gjyqtarja bëri ankimin të vendimit të KPK, pas shkarkimit nga detyra, por ky vendim është lënë në fuqi nga KPA.
“Trupi gjykues i Kolegjit të Posaçëm të Apelimit, i përbërë nga Sokol Çomo kryesues, Natasha Mulaj relatore, Albana Shtylla, Mimoza Tasi, Rezarta Schuetz anëtare, shpalli vendimin për çështjen nr. 19/2022, datë 20.04.2022, që i përket ankimit të subjektit të rivlerësimit Flutura Hoxha kundër vendimit të Komisionit të Pavarur të Kualifikimit nr. 513, datë 25.02.2022.
Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi: Lënien në fuqi të vendimit nr. 513, datë 25.02.2022 të Komisionit të Pavarur të Kualifikimit, që i përket subjektit të rivlerësimit Flutura Hoxha”, thuhet në vendim.
Discussion about this post