Kolegji Zgjedhor ka rrëzuar padinë e Lindita Veliasit dhe ka vendosur se mandati i këshilltares në Bashkinë e Tiranës i takon Genta Mezinit. Në trupin gjykues në Kolegjin Zgjedhor ishin anëtarë: Tomor Skreli, Ridvan Hado, Astrit Kalaja ,Gjin Gjoni dhe Lindita Sinanaj.
Sjellim në vëmendje që kandidatja e LSI-së, Lindita Veliasi e renditur e 17 në listën shumëemërore të këshilltarëve në këtë parti pretendonte se mandati është i saji dhe se KQZ e ka anashkaluar në mënyrë të kundraligjshme. Pra sipas prentendimit të saj, Genta Mezini nuk duhet të ishte anëtare e LSI-së në Këshill pasi vendi i takonte Veliasit.
Lindita Veliasi depozitoi në Kolegjin Zgjedhor një kërkesë ku pretendonte mandatin, pasi Genta Mezini është e 19 në listë, ndërsa kjo e 17-ta.
Theksojmë që Genta Mezini ishte një nga anëtarët e Këshillit Bashkiak në Tiranë që përfaqësonte Lëvizjen Socialiste për Integrim në këtë bashki. Vetëm disa ditë më parë bashkë me Agim Krajën votuan pro rritjes së çmimit të ujit të pijshëm në Tiranë.
Nga ana e LSI-së kjo u cilësua si një veprim kundra vullnetit të kësaj partie, kundra qytetarëve. LSI deklaroi pak ditë më parë se këta dy anëtarë janë të përjashtuar nga kjo parti. (J.V/Shuplaka)
