Gjatë konferencës së përbashkët për shtyp me homologun austriak, ministri i Brendshëm, Saimir Tahiri, u pyet lidhur me komentet më të fundit të ministrit të Drejtësisë, Ylli Manjani.
Në përgjigjen e tij, Saimir Tahiri u shpreh se punën e tij dhe të ministrit në fjalë e vlerëson kryeministri i Shqipërisë dhe e gjykon publiku.
“Unë s’jam komentator, jam ministër dhe kam detyrimin të bëj punën time më mirë për një Shqipëri më të drejtë, më të sigurtë dhe më të zhvilluar. Nuk kam dëshirë të komentoj, aq më pak kur komentet janë nga një koleg i imi, i cili po si unë ka detyrën të bëjë sa më mirë detyrën. Punën tonë e vlerëson Kryeministri dhe mbi të gjitha e vlerëson dhe e gjykon publiku.”, u shpreh Tahiri.
Ky reagim i ministrit të Brendshëm vjen pas deklaratës që ministri i LSI-së, Ylli Manjani, bëri mbrëmjen e djeshme i ftuar në “Top Story”.
“Është shumë serioz dhe për të shkuar partizan në mal tek hashashi, çmimi luhatet nga 20 mijë deri në 40 mijë lekë. Pra njerëz që i shihnim rregullisht, këto kohë kanë preferuar të dalin partizanë e të bëjnë këtë punë të paligjshme. Fenomeni ekziston dhe ekziston në mënyra të frikshme. Shqipëria po jep një imazh gjithnjë e më shumë që po kultivon hashash.”, u shpreh Manjani i pyetur nëse mendimi se nevojitet ushtria për të luftuar kanabisin është serioz. (XH.A/SHUPLAKA)
