Duke iu referuar miratimit të 3 kandidaturave për komisionin ‘ad hoc’ të dy deputetëve të Partisë Socialiste Vasilika Hysi dhe Ulsi Manja si dhe atij të LSI-së, Luan Rama, juristi Çlirim Gjata tha në “Studio e Hapur” se ky komision është i vlefshëm, por nuk është funksional.
“Komisioni është i vlefshëm, por nuk është funksional. Duhet shumica e kuorumit 6+1. Është ngritur vetëm gjysma e vettingut. Institucionet e reja mund të themi se janë të pezulluara. KLD nuk ngre dot SPAK-un apo institucione të tjera. Nëse nuk ngrihen institucionet e reja brenda 8 muajsh do vijojnë të jenë në detyrë këto aktualet,”- tha Gjata.
Analisti Arian Çani ndërkohë komentoi shprehjen e famshme të kryeministrit Rama, ku është shprehur se ‘vettingu ose do bëhet, ose do bëhet’. Çani u shpreh se Rama po luan lojë, pasi ai vetë nuk e do vettingun dhe reformën në drejtësi. Ai tha se ndërkombëtarët duan të marrin në dorë drejtësinë në Shqipëri.
“Unë mendoj se Rama edhe mos të ketë asgjë, ai po luan me bllofin. Ai po na tregon se është një lojtar i paparë. Rama nuk e do vettingun. Askush nuk do që vettingun ta marrin në dorë ndërkombëtarët. Kur ai thotë o do bëhet o do bëhet, ai shantazhon. I vetmi i fituar në këtë rast është Rama. Basha bën mirë që nuk shkon. Por çfarë është kjo zhurmë? Pra janë disa ndërkombëtarë që duan të marrin drejtësinë në dorë. Unë mendoj se e gjitha kjo është një lojë. Askush nuk mendon për ne. Unë nuk shoh vetëm Shqipërinë, por shoh edhe vendet e tjera”- tha Çani. (M.D/ Shuplaka)
Discussion about this post