Pas publikimit të listës me 101 emrat e zyrtarëve të cilët sipas komentuesve kishin lidhje me korrupsionin në administratë, juristët denoncojnë se ky publikim nga ana e kryeministrit Edi Rama po shkel të drejtat e njeriut.
“Vendosja e burimeve të informacionit nga rrjetet sociale si provë e fajësisë bie jo vetëm në kundërshtim me të drejtën themelore të të drejtave të njeriut dhe me konventën evropiane për të drejtat e njeriut për zhvillimin e një procesi të rregullt ligjor që ka të bëjë me fajësinë dhe pafajësinë, por bie në kundërshtim edhe me terrenin human ku jeton njeriu. Që do të thotë se, njeriu në mënyrë proceduriale dhe literale duhet vendosur para faktit. A është thënia në rrjetet sociale fakt? Mund të jetë indicje, por jo fakt”, është shprehur avokati Sokol Hazizaj për Top Channel.
Sakaq, lidhur me këtë çështje ka reaguar edhe Komiteti shqiptar i Helsinkit, që e cilëson sit ë paligjshëm këtë veprim.
“Publikimi i të dhënave në faqet e internetit apo në çdo lloj forme tjetër publike i të dhënave ndaj këtyre personave, të cilët mund të jenë nënpunës të administratës, specialistë të thjeshtë apo funksionarë në këto institucione, jo vetëm është e paligjshme por mund të krijojë shqetësime të panevojshme”, thotë Erida Skëndaj, drejtoreshë e Komitetit Shqiptar të Helsinkit.
Discussion about this post