Këshilltari ligjor në Partinë Demokratike Gazment Bardhi, i ftuar në studion e televizionit Fax News, ka folur rreth konferencës për shtyp të ish-ministrit Saimir Tahiri.
Sipas tij, “Saimir Tahiri doli sot për të shpëlarë veten nga akuzat, një skenar i përgatitur me Edi Ramën”.
Bardhi u shpreh se Tahiri nuk ka kryer krime në Itali, por në Shqipëri, dhe ka një sërë akuzash nga Prokuroria shqiptare.
“Ai është dalë i pafajshëm në Itali, por kjo nuk vlen për autoritetet shqiptare, pasi ai akuzohet nga prokuoria shqiptare për veprimtarinë e tij si ministër në Shqipëri. Pasi akuzohet se i ka vënë në dispozicion policinë, makinën e tij dhe skafin e tij personal bandës së Habilajve, që të mos ndaloheshin”, – tha Bardhi.
Më tej zyrtari demokrat u shpreh se Tahiri në konferencën tha të njëjtat gjëra që kishte thënë 3 vite më parë kur do të akuzohej së pari, por nuk tha asgjë lidhur me hetimet e prokurorisë sonë, e cila po verifikon rolin e Tahirit si ish-ministër i Brendshëm.
“Ajo që ka thënë drejtësia italiane është se Saimir Tahiri ka ndihmuar grupin kriminal, por nuk e ka kryer në Itali por në Shqipëri. Këtë ka thënë drejtësia italiane, dhe tani ia ka lënë në dorë drejtësisë shqiptare, sepse Italia nuk mund të hetojë veprimtarinë e Tahirit në Shqipëri”, sqaroi Bardhi.
(B.B/ Faxweb.al)
Discussion about this post