Ka shkuar në 6 numri i të prekurve në vendin tonë nga virusi COVID 19. Burimet zyrtare nga Ministria e Shëndetësisë bëjnë me dije se pas testimit të 14 rasteve të reja gjatë ditës së sotme, 4 persona kanë rezultuar të prekur nga virusi i rrezikshëm.
Bëhet me dije se nga 3 personat të cilët kanë rezultuar pozitivë, janë familjarë të 2 personave të konfirmuar gjatë ditës së djeshme, at e bir çka e çon në 5 numrin e të prekurve brenda familjes të të ashtuquajturit ‘pacienti zero’.
Sqarohet se të gjithë personat e kontaktit të tyre janë në vetëkarantinim për të shmangur infektimin e personave të tjerë, ndërsa u janë marrë mostra edhe të gjithë personave me të cilët kanë pasur kontakte të ngushta.
Aktualisht, sipas burimeve zyrtare bëhet e ditur se gjendja e tyre rezulton pa probleme të veçanta.
Rasti i katërt është një 31-vjeçar me banim në Tiranë i cili ka pasur një histori udhëtimi në Milano 6 ditë më parë dhe është kthyer pas një qëndrimi të shkurtër 1 ditor në vendin fqinj. Ai po trajtohet bashkë me 2 rastet e mbrëmshme, në Spitalin Infektiv dhe gjendja e tij paraqitet pa probleme të veçanta.
“Deri tani janë testuar 77 raste dhe numri i atyre që kanë rezultuar pozitiv për COVID-19 është 6.
Duke vlerësuar punën e stafeve mjekësore në këto momente të vështira dhe garantuar gatishmërinë e shërbimit tonë shëndetësor sipas planit të hartuar mbi protokollin e OBSH-së, Ministria e Shëndetësisë fton qytetarët të ndjekin me kujdes rekomandimet zyrtare dhe të kujdesen posaçërisht për masat e higjienës personale. Për çdo rast të shfaqjes së shenjave të infeksionit respirator, si temperaturë, kollë, vështirësi në frymëmarrje, sidomos për personat që kanë histori udhëtimi me vendet e prekura apo kanë pasur kontakt me ta, Ministria e Shëndetësisë dhe Mbrojtjes Social u lutet qytetarëve të lidhen me Urgjencën Kombëtare në nr. 127!“, thuhet në njoftimin zyrtar të Ministrisë së Shëndetësisë.
Discussion about this post