Gjykata e Tiranës me kërkesë të Prokurorisë vendosi sot konfiskimin e pasurive të Alda Klosit dhe ish-bashkëshortit të saj, të akuzuar për veprën penale “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur e nëpunësve publik ose i çdo personi tjetër që ka detyrim ligjor për deklarim”.
Në mars 2024, Gjykata e Tiranës shpalli fajtore dhe dënoi me 2.6 vite burg ish-shefen e kabinetit të ish-zv/kryeministrit Arben Ahmetaj, Alda Klosi së cilës iu gjendën pasuri të pajustifikuara pas denoncimit që ajo kreu për vjedhje nga pastruesja e saj. Në aplikim të gjykimit të shkurtuar, Klosi u dënua me 20 muaj burg.
Në pasuritë e konfiskuara përfshihet një apartament, garazh dhe një shumë prej rreth 500 mijë euro.
Sipas prokurorisë së Tiranës “nga procedimi pasuror, rezultoi se e pandehura/subjekti i hetimit pasuror A.K. e cila është përfshirë si subjekt deklarimi në ILDKPKI që në vitin 2016, nuk ka deklaruar në këtë institucion pasurinë që nuk e justifikon atë me burime të ligjshme të të ardhurave”.
“Nga analiza e fakteve dhe e dokumentacionit të administruar rezulton se pasuritë e paluajtshme të llojit apartament dhe garazh, që zotërohen nga ajo dhe nga personi i lidhur, janë pasuri të pajustifikuara nga të ardhurat e ligjshme. Këto pasuri të paluajtshme janë fshehur dhe nuk janë deklaruar në deklaratat e ILDKPI nga personi i hetuar A.K”, njofton prokuroria.
Në bazë të hetimeve me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u konfiskuan pasuritë e mëposhtme:
Shuma monetare 368.000,00 (treqind e gjashtëdhjetë tetëmijë) Lekë, 15.600,00 (pesëmbëdhjetë mijë e gjashtëqind) USD dollarë amerikan, 462.950,00 (katërqind e gjashtëdhjetëedymijë e nëntëqindepesëdhjetë) Euro, sekuestruar për llogari të procedimit penal nr. 9220/2022 dhe arkëtuar në llogarinë e Prokurorisë në 10.01.2023;
Apartament me siperfaqe 85.09 m2 të shfrytëzueshme me numër pasurie 6/572+1-35, ZK 8210, Vol. 42,Fq 127 pasuri e ndodhur në Tiranë, në pronësi të shtetasit A.K.;
Garazh me sipërfaqe 14.06 m2 të shfrytëzueshme, pasuri e ndodhur në Tiranë, në pronësi të shtetasit A.K.
