Një ngjarje e rëndë është shënuar në lagjen “Qemal Stafa” të qytetit të Shkodrës, ku shtetasi Ilir Aliaj 40 vjeç, me profesion mjek, është ekzekutuar me dy plumba, në sy të djalit 16-vjeçar.
Burime të policisë kanë bërë me dije emrin e autorit të dyshuar, Dritan Ymeri 26 vjeç dhe pistën e mundshme që është ajo e konfliktit të pronësisë. Mësohet se autori dhe viktima jetonin në një pallat, ku secili prej tyre kishte nga tri hyrje dhe raportohet se një konflikt mes tyre për pronësinë e banesave ka nisur fillimisht me zënka dhe fyerje, për të degraduar në ngjarjen e rëndë.
Gjatë momentit të vrasjes ka qenë i pranishëm edhe djali 16-vjeçar i viktimës, i cili ka parë të gjithë skenën. Fillimisht forcat e policisë janë përpjekur të negocionin gjatë mbrëmjes me autorin që mundi të largohet nga vendi i ngjarjes. Pavarësisht ndërhyrjes së forcave speciale RENEA, autori i dyshuar ka mundur të arratiset.
Njoftimi i policisë:
Në sallën operative të Drejtorisë Vendore të Policisë Shkodër ka ardhur një telefonatë për nje vrasje të ndodhur në lagjen “Qemal Stafa”, te “Ish Dekori”.
Me marrjen e njoftimit, shërbimet e Policisë kanë shkuar menjëherë në vendngjarje ku ka rezultuar se:
Pas një konflikti të çastit mes shtetasit I.A dhe D.Y, ky i fundit ka qëlluar me armë zjarri shtetasin I.A, ku si pasojë e të shtënave ka mbetur i vrarë shtetasi I. A., 40 vjeç, banues në lagjen Qemal Stafa.
Autori i dyshuar shtetasi D.Y, sipas informacioneve dyshohet se është fshehur në banesë, e cila është rrethuar nga Policia dhe pritet ndërhyrja e F.N.SH.
Grupi hetimor në vendngjarje po punon për grumbullimin e provave ligjore duke bërë të mundur sqarimin e rrethanave të ngjarjes si dhe dokumentimin ligjor të saj.
Discussion about this post