Në një kohë krize politike në vend, dhe një situate aspak të qetë në të gjithë Ballkanin, kryeministri shqiptar Edi Rama ka zgjedhur të rrëfehet për mediat e Beogradit.
Rama iu ka hapur zemrën gazetarëve të mediave serbe dhe për marrëdhënien e tensionuar të kohëve të fundit mes tij dhe Ramush Haradinajt.
Po ashtu ai ka theksuar edhe një here se taksa ndaj mallrave serbe duhet të pezullohet që të nisë dialogu, ndërsa për kufijte nuk ka pranuar të flasë duke thënë vetëm se Kosova dhe Serbia duhet të bashkohen në Europë.
“Serbia duhet të përballet me realitetin dhe të pranojë se Kosova është shtet i pavarur dhe i lirë. Nevoja për pajtim është e pashmangshme dhe sa më shumë Serbia vazhdon në këtë ëndërr se kjo nuk ka ndodhur apo se mund të evitoje këtë kjo do të jetë më e dhimbshme për të gjithë”, është shprehur Rama.
Më tej ka thënë se asnjëherë nuk ka folur për “Shqipërinë e Madhe” sepse ai është term që është shpikur në mënyrë që të përdoret kundër shqiptarëve.
“Shqiptarët dhe serbët mund të bëjnë për Ballkanin atë që bënë gjermanët dhe francezët për Evropën”. Taksat që ka vendosur Prishtina, Rama i ka quajtur “klithmë politike”, ndërsa duke komentuar çfarë ka thënë publikisht se Haradinaj ka gënjyer për presionet për heqje të taksës ndaj mallrave serbe, ai tha se ka mbështetur pezullimin e tyre.
“Jam në shënjestër si nga Ramushi ashtu nga miqtë në Beograd. As kancelaria Merkel as presidenti i Francës, as unë nuk kemi bërë presion të hiqen taksat, po të pezullohet që të bëhet e mundur nisja e bisedimeve”, tha më tej Rama për tv serb pink tv.
Ai ka thënë se e ka mik presidentin serb Vuçiç. “Një gjë e çmuar në raportin tonë është se jemi pajtuar me atë që nuk jemi pajtuar, pra bisedojmë hapur dhe në mënyrë miqësore dhe jetojmë me mospajtimin tonë”, theksoi Rama.
(E.K/FAXWEB.AL)
Discussion about this post