Disa ditë pas konflikteve të fundit midis policisë dhe artistëve për shembjen e godinës së Teatrit ka reaguar edhe Kisha Katolike. Në një aktivitet nga fshati turistik në Malësinë Kurbin,gjatë pelegrinazhit në festa e përvitshme krahinore të Kishës së Shën Prende, Imzot George Fredo, nuk ka nguruar që të jap mesazhin e tij.
“Politika duhet të tregojë integritet moral për krijimin e kushteve të nevojshme në interes të qytetarëve. Paqja në këtë vend duhet të karakterizojë gjithë krahët politikë, politika duhet të jetë në shërbim të qytetarëve. Politika duhet të tregojë vullnet në zgjidhjen e konfliktit më të fundit për Teatrin Kombëtar, duke ia lënë institucioneve që të veprojnë me zgjuarsi dhe maturi.”, është shprehur Ipeshkvi i Durrësit dhe Tiranës.
Gjatë aktivitetit të sotëm po ashtu është mbajtur një panair me produkte bujqësore dhe blegtorale, por edhe artizanale, muzikë popullore e trevës kurbinase dhe përshëndetje për mysafirët e vecantë ishte gjithçka e përgatitur për komunitetin.
Banorët i kanë kërkuar përfaqësuesit të lartë të Kishës Katolike të mbrojë e të rrisin vlerat e Kishës por edhe Shkollës së parë shqipe që nga koha e Skënderbeut, duke propozuar edhe një memorial për ata që kanë kontribuar ndër vite në funksion të vlerave historike.
Edhe pse zona është në projektin e 100 fshatrave, aktiviteti u bojkotua nga drejtuesit vendorë.
