Një mision urgjent është nisur në Europë për të hetuar ndikimin e ndërhyrjes së George Soros në Ballkan, mes të tjerash edhe në Shqipëri. Lajmi bëhet i ditur nga media amerikane “American Spectator”, e cila raporton së fundmi misionin urgjent të nisur nga kryetari i Dhomës së Drejtësisë në Kongresin Amerikan, republikani Bob Goodlate.
Goodlate udhëheq një delegacion prej 15 personash në një mision në disa vende, mes të tjerash në: Shqipëri, Kosovë, Maqedoni, Itali, Greqi, Bosnjë. Hetimi flitet të jetë i pavarur nga Departamenti Amerikan i Shtetit, por nuk dihen më shumë detaje për shkak të sigurisë.
Për median amerikane ka folur dhe një prokurore shqiptare që nuk ka dashur të identifikohet. Ajo sjell në vëmendje përplasjet mes kryeprokurorit Adriatik Llalla dhe ambasadorit Donald Lu. Më tej, prokurorja shprehet se ambasada amerikane ka mohuar kultivimin masiv të kanabisit krahasuar me Prokurorinë që sipas saj i dha përparësi trafikut të drogës.
Shkrimi i plotë për Shqipërinë:
Prokurori i Përgjithshëm kundër Ambasadës së SHBA në Tiranë
Një ndërhyrje e keqe u shfaq gjatë këtij viti midis Zyrës së Kryeprokurorit të Përgjithshëm të Shqipërisë, një institucioni kombëtar të pavarur dhe ambasadorit amerikan Donald Lu.
“Kryeministri Edi Rama, mbështetur nga ambasadori i SHBA, ka shkatërruar pavarësinë e gjyqësorit tonë”, deklaroi një prokurore duke folur nga Tirana me telefon për The American Spectator. “Nën flamurin e reformës gjyqësore, ata po arrijnë ta politizojnë atë.”
Edi Rama, udhëheqës i vjetër i Partisë Socialiste, është mik i ngushtë i Geroge Soros, rrjeti i të cilit është thellësisht i përfshirë në Shqipëri, duke bashkëpunuar me Ambasadën e SHBA në projekte të shumta, duke përfshirë një projekt prej 8.8 milion dollarë të USAID në … besoj e kuptoni që bëhet fjalë për projektin e Reformës në Drejtësi.
“Kur shprehëm mendime profesionale, të ndryshme nga Ambasada e SHBA – mendime profesionale për mënyra të ndryshme, Lu u zemërua”, tha prokurorja, e cila dëshiron të mbetet anonime.
Ajo shpjegoi se Komisioni i Venecias, i kontaktuar për të ndihmuar nëse propozimet ishin të pajtueshme me të drejtën evropiane, shpesh u rreshtua me prokurorët shqiptarë në debatin teknik.
Prokurorja shtoi se zyra e saj u përpoq t’i jepte përparësi trafikut të drogës dhe kriminalitetit, çështjeve kryesore në Shqipëri, ndërsa ambasada e SHBA mohoi kultivimin e masiv të kanabisit dhe trafikun si “jo si një problem i SHBA”.
Donald Lu ndëshkoi prokurorët dhe gjyqtarët që nuk u pajtuan me të, duke u revokuar vizat amerikane për 70 gjykatës dhe prokurorë, sipas kryeprokurorit Adriatik Llalla.
Në përgjigje, Llalla shpërtheu ndaj ambasadorit Lu, duke e akuzuar atë për manipulim dhe shantazh, në një letër të ashpër të postuar në faqen e internetit të zyrës së tij dhe në një konferencë për shtyp të mbajtur në shkurt.
Llalla gjithashtu e akuzoi Lu se u përpoq të ndalojë zyrën e tij nga hetimi i praktikave korruptive të firmës kineze, Bankers Petroleum.
Washington Times pati një shkrim kryesor mbi këtë konflikt tre muaj më parë, të titulluar: “Departamenti i Shtetit i infektuar nga Soros luan lojëra në Shqipëri”.
(XH.A/SHUPLAKA)
