Pas publikimit të konkluzioneve nga Këshilli i Europës për Shqipërinë, deputetja e Partisë Demokratike Majlinda Bregu, në një deklaratë për mediat në cilësinë e kryetares së Komisionit për Integrimin Europian, u bëri thirrje të gjithë aktorëve politikë dhe jo vetëm, që të ulen për të gjetur kompromisin për të plotësuar detyrat në kuadër të integrimit.
Deputetja demokrate tha se të gjithë shqiptarët duhet të formulojnë një qëndrim kombëtar, ku domosdoshmërisht plotësimi i detyrimeve që janë para nesh sot të vendosura nga BE, të shpallen interesi kombëtar i shqiptarëve, pavarësisht datës kur BE do të hapë negociatat.
“Shqiptarët jo për faj të tyre kanë humbur shumë kohë. Ndaj le të ulemi sot në shenjën e kompromisit politik, të gjejmë rrugën dhe nxitjen së brendshmi për të plotësuar detyrimet që sot janë para nesh. E di se gjithkush po mendon tani se të gjitha këto do të mbeten fjalë sepse Shqipëria bëhet gati të hyjë në fushatë zgjedhore, por pikërisht edhe për këtë arsye që integrimi europian të mos përdoret e keqpërdoret gjatë fushatës zgjedhore, në cilësinë e kryetares së Këshillit Kombëtar të Integrimit Europian, po përsëris sot publikisht thirrjen për përcaktimin e vizionit tonë kombëtar afatgjatë për procesin e negociatave të anëtarësimit të Shqipërisë në BE”, u shpreh ndër të tjera ish-ministrja e Integrimit.
DEKLARATA E PLOTË:
Këshilli i Çështjeve të Përgjithshme të BE, dje për herë të parë ka nxjerrë në një deklaratë për shtyp rezultatet e takimit, dhe jo konkluzione të dakordësuara unanimisht, dhe pse kjo nuk ka lidhje vetëm me Shqipërinë.
Që procesi i integrimit Europian është bërë me një milion të panjohura, e që vetëm momentumi i Shqipërisë, edhe në qoftë i mirë nuk mjafton për një vendim unanim, tashmë është e qartë. Shqipëria miraton shumë ligje, por zbaton pak prej tyre! Prej asaj çka Këshilli bëri publike dje është e qartë se Shqipëria ka një krye-detyrim për të zbatuar që është ligji i Vetting-ut, plotësimin e prioriteteve të tjera për hapjen e negociatave, dhe me rëndësi jetike është shpëtimi i politikës nga bashkëjetesa me krimin, pra zbatimi i ligjit të dekriminalizimit i cili do të ishte një garanci më shumë edhe për zhvillimin e zgjedhjeve të lira dhe të ndershme.
Por nëse mbledhja e Këshillit u mbyll pa vendim, dhe ne presim kur do të na vijë radha tjetër për tu diskutuar duke mos u marrë ndërkohë me problemet reale,si krimi, droga, korrupsioni, që e mbajnë Shqipërinë ende larg anëtarësimit, ne s’bëjmë gjë tjetër veçse e dëmtojmë vetë procesin.
Problemet e brendshme të BE ka kohë që projektojnë më shumë paqartësi për procesin e zgjerimit. Situata në BE nuk është në periudhën më të përshtatshme për ne, por të mos qenit agresiv për zbatimin e detyrimeve do të na bëjë edhe më të papërshtatshëm, edhe rastin më të vështirë. Nëse qeveria do të zgjedhë të bindë Europën vetëm me retorikën e fjalëve, dhe e përditshmja do të tregojë të kundërtën, kjo do të na kushtojë më tepër.
Në pavëmendjen Europiane sot për zgjerimin, ne le të dëshmojmë që reformat janë për Shqiptarët dhe jo për datën kalendarike të anëtarësimit. Fuqia transformuese e këtij procesi qëndron te vullneti i një qeverie për të zbatuar detyrimet dhe për të qenë kah standardeve europiane. Shqipëria nuk ka axhendë të ndryshme të krahasuar me atë të një vendi evropian, por zbatimi i ligjit, rezultatet bindëse në luftën kundër krimit, korrupsionit, respektimit të të drejtave të njeriut, zgjedhjet me standard europian dhe kompromisi politik, do të përcaktojnë kalendarin real të negociatave.
Nuk kemi qenë ndonjëherë të përkëdhelurit e Europës dhe e kemi përballur procesin në çdo hap si sfidë, nga nënshkrimi i MSA, liberalizimi i vizave, marrja e statusit të vendit kandidat, pse jo dhe anëtarësimi në NATO, por çdo vonesë nga ana jonë, qoftë apati apo mungesë vullneti politik, është si ta dëmtosh procesin me duart e tua.
Ka filluar countdown-i i përballjes me reformat e thella dhe të dhimbshme: luftë kundër kulturës së pandëshkueshmërisë, luftë kundër përfshirjes së krimit në politikë, luftë kundër shkatërrimit të standardeve zgjedhore.
Ne nuk negociojmë dot kushtet që na vendos Europa, qofshin ato 5, 7 apo kushedi sesa do të shtohen gjatë rrugës, por ne mund të negociojmë me njëri tjetrin si shqiptarë për Shqipërinë, dhe të formulojmë një qëndrim kombëtar, ku domosdoshmërisht plotësimi i detyrimeve që janë para nesh sot të vendosura nga BE, të shpallen interesi kombëtar i shqiptarëve, pavarësisht datës kur BE do të hapë negociatat.
Me gjithë respektin për Kohën e Brukselit e të vendeve anëtare, shqiptaret jo për faj të tyre kanë humbur shumë kohë. Ndaj le të ulemi sot në shenjën e kompromisit politik, të gjejmë rrugën dhe nxitjen së brendshmi për të plotësuar detyrimet që sot janë para nesh. E di se gjithkush po mendon tani se të gjitha këto do të mbeten fjalë sepse Shqipëria bëhet gati të hyjë në fushatë zgjedhore, por pikërisht edhe për këtë arsye që integrimi europian të mos përdoret e keqpërdoret gjatë fushatës zgjedhore, në cilësinë e kryetares së Këshillit Kombëtar të Integrimit Europian, po përsëris sot publikisht thirrjen për përcaktimin e vizionit tonë kombëtar afatgjatë për procesin e negociatave të anëtarësimit të Shqipërisë në BE!
E duam Shqipërinë si gjithë Europa, është ëndrra prej 26 vitesh e shqiptarëve, dhe ne nuk mund të bëjmë asgjë më shumë përveç se të jemi shërbëtorët e tyre në këtë proces.
